ह्वाइटहाउस वार्ता आशाजनक, त्रिपक्षीय बैठकको तयारीमा जोड
काठमाडौँ — रुस–युक्रेन युद्ध अन्त्यका लागि अमेरिकाको राजधानी वाशिङ्टनस्थित ह्वाइटहाउसमा भएको वार्ता आशाजनक बनेको छ। अमेरिकी राष्ट्रपति डोनाल्ड ट्रम्प र युक्रेनका राष्ट्रपति भोलोदिमिर जेलेन्स्कीबीच सोमबार भएको भेटमा युद्धविराम र सुरक्षा ग्यारेन्टीबारे महत्वपूर्ण छलफल भएको अन्तर्राष्ट्रिय समाचार एजेन्सीहरूले जनाएका छन्।
बैठकपछि जेलेन्स्कीले युद्ध अन्त्यका लागि सबै पक्ष तयार भएको विश्वास व्यक्त गर्दै, “हामी रुसलाई रोक्न चाहन्छौं, शान्तिका लागि सुरक्षा ग्यारेन्टीबारे थप छलफल हुनेछ,” भनेका छन्। उनले आगामी त्रिपक्षीय बैठकमा युक्रेन सहभागी हुन तयार रहेको स्पष्ट पारे।
राष्ट्रपति ट्रम्पले पनि वार्तालाई सफल ठहर गर्दै अमेरिका, युक्रेन र रुसबीच त्रिपक्षीय बैठक गर्ने तयारी भइरहेको बताए। उनका अनुसार, रुसले समेत सुरक्षासम्बन्धी प्रस्तावमा सकारात्मक संकेत दिएको छ, जसले वार्ताको सम्भावना अझै बढाएको छ।
वार्तापछि युरोपेली नेताहरूसँगको बैठकमा पनि युद्ध अन्त्यका लागि साझा आवाज सुन्न सकियो। नेटो महासचिव मार्क रुट्टे, युरोपेली आयोगकी अध्यक्ष उर्सुला भोन डेर लेयेन, जर्मनीका चान्सलर फ्रेडरिक मर्ज, इटालीकी प्रधानमन्त्री जर्जिया मेलोनी, फ्रान्सका राष्ट्रपति इमानुएल म्याक्रों र बेलायतका प्रधानमन्त्री कियर स्टार्मरलगायत नेताहरूले युद्ध रोक्नुपर्नेमा जोड दिएका छन्। उनीहरूले शान्तिको पूर्वसर्तका रूपमा सुरक्षा ग्यारेन्टी सुनिश्चित गर्नुपर्ने धारणा राखेका छन्।
गत अगस्ट १५ मा रुसी राष्ट्रपति भ्लादिमिर पुटिनसँगको वार्ता निष्फल भएपछि ट्रम्पले जेलेन्स्कीलाई वाशिङ्टन बोलाएका थिए। अहिले भएको छलफलले आगामी दिनमा त्रिपक्षीय बैठकका माध्यमबाट युद्धविरामतर्फ ठोस कदम चाल्न सकिने आशा जगाएको छ।
