साफ यू–१७ महिला फुटबल : बंगलादेशसँग पराजित भएपछि नेपालको उपाधि आशा कमजोर
काठमाडौँ — भुटानमा जारी साफ यू–१७ महिला फुटबल च्याम्पियनसिपमा नेपाल फेरि निराश बन्यो। आइतबार भएको खेलमा नेपाल ३–० ले बंगलादेशसँग पराजित हुँदै प्रतियोगिताको दौडमा कमजोर स्थितिमा पुगेको छ।
डबल राउन्ड रोबिन प्रारूपमा भइरहेको प्रतियोगितामा नेपालले तीन खेलमा दुई हार बेहोरेको छ। यससँगै नेपालको उपाधि सम्भावना लगभग अन्त्य भएको छ।
नेपालले पहिलो खेलमा भारतसँग ७–० को ठूलो हार खेलेको थियो भने दोस्रो खेलमा भुटानलाई हराउँदै तीन अंक जोडेको थियो। तर तेस्रो खेलमा बंगलादेशसँग हार्नु परेपछि नेपाल पुनः संकटमा परेको हो।
बंगलादेशका लागि ४१औं मिनेटमा थुनुए मार्माले पहिलो गोल गरिन्। त्यसको तीन मिनेटमै सौरभी प्रीतिले दोस्रो गोल थपिन्। खेलको अन्तिमतिर, इन्ज्युरी समयको चौथो मिनेटमा ममानी चक्काले तेस्रो गोल गर्दै नेपालको हार सुनिश्चित गरिन्।
तीन खेलपछि नेपाल तीन अंकमा सीमित छ भने बंगलादेश ६ अंकसहित उपाधि दौडमा छ। भारतले सबै खेल जित्दै ९ अंकसहित शीर्ष स्थानमा छ। आयोजक भुटान भने लगातार हारसँगै अंकविहीन रह्यो।
अब नेपालले आगामी बुधबार पुनः बंगलादेशसँग प्रतिस्पर्धा गर्नेछ।
