कुशल मल्लको शानदार अर्धशतक व्यर्थ, नेपाल ३२ रनले पराजित
काठमाडौं — टप एण्ड टी–२० सिरिजमा नेपालले लगातार दोस्रो हार बेहोरेको छ। डार्विनस्थित मरारा क्रिकेट मैदानमा बंगलादेश ‘ए’ विरुद्धको खेलमा नेपाल ३२ रनले पराजित भएको हो।
बंगलादेशले दिएको १८७ रनको लक्ष्य पछ्याउने क्रममा नेपालले निर्धारित २० ओभरमा ७ विकेट गुमाएर १५४ रन मात्रै बनाउन सक्यो।
नेपालका मध्यक्रमका ब्याट्सम्यान कुशल मल्लले उत्कृष्ट प्रदर्शन गर्दै ४७ बलमा अविजित ५९ रनको पारी खेले। अन्तिममा उनले नन्दन यादवसँग मिलेर ४७ रनको साझेदारी गरे पनि नेपाललाई जित दिलाउन सकेनन्। नन्दन ९ बलमा १४ रनमा अविजित रहे।
तर, अन्य ब्याटरहरूले अपेक्षित प्रदर्शन गर्न सकेनन्। ओपनर कुशल भुर्तेल १२ रनमै आउट भए भने आसिफ शेखले २८ रन बनाए। दीपेन्द्र सिंह ऐरी, गुलशन झा र करण केसी सस्तो स्कोरमा पभेलियन फर्किए।
बंगलादेश ‘ए’ का लागि रकिबुल हसनले ३ विकेट लिँदै बलिङमा उत्कृष्ट प्रदर्शन गरे।
यसअघि, टस जितेर पहिले ब्याटिङ गरेको बंगलादेशले २० ओभरमा ६ विकेटको क्षतिमा १८६ रन जोडेको थियो। जसिन आलमले ७१ रनको दमदार पारी खेले भने अफिफ होसैन ४८ रनमा अविजित रहे। नेपालका लागि रिजन ढकालले २ विकेट लिए भने सन्दीप लामिछाने, करण केसी र नन्दन यादवले १–१ विकेट हात पारे।
यो हारसँगै नेपाल सिरिजमा लगातार दोस्रो पटक पराजित भएको हो। अब नेपालले तेस्रो खेल मेलबोर्न स्टार्ससँग खेल्नेछ।
