१९ जनाको ज्यान गयो: बंगलादेशमा सैनिक विमान क्याम्पमै खस्यो, सयौं घाइते
भैरहवा अनलाइन ५ श्रावण २०८२, सोमबार | काठमाडौँ
बंगलादेशको राजधानी ढाकाबाट दुःखद खबर आएको छ। एक सैन्य अभ्यासका क्रममा विमान अनियन्त्रित भई सैनिक क्याम्पभित्रै खस्दा १९ जनाको ज्यान गएको छ भने सयौँ मानिस घाइते भएका छन्।
प्रत्यक्षदर्शीका अनुसार, विमान आकाशमै केही बेर अनियमित गतिमा देखिएको थियो। त्यसपछि क्याम्प परिसरभित्रै ठूलो आवाजसहित खसेको थियो। विमान खसेको ठाउँ वरपर रहेका भवनहरूमा पनि क्षति पुगेको जनाइएको छ।
बंगलादेशी सेनाले दुर्घटनाको पुष्टि गर्दै उच्चस्तरीय अनुसन्धान सुरु गरिएको जनाएको छ। अहिले उद्धार कार्य तीव्र गतिमा भइरहेको छ। घाइतेहरूलाई राजधानीका विभिन्न अस्पतालमा उपचारका लागि लगिएको छ।
यस दुर्घटनाले बंगलादेशमा शोकको वातावरण सिर्जना गरेको छ। देशभरबाट मृतकप्रति श्रद्धाञ्जली अर्पण गर्न सामाजिक सञ्जालमार्फत जनसामान्यले भावपूर्ण प्रतिक्रिया व्यक्त गरिरहेका छन्।
अधिक जानकारी आउन बाँकी छ।
