अमेरिकाको पेन्सिलभेनियामा फलाम कारखानामा विस्फोट, एकको मृत्यु, दर्जनौँ घाइते

काठमाडौँ — अमेरिकाको पेन्सिलभेनिया राज्यको क्लेर्टनस्थित यूएस स्टील क्लेर्टन कोक वर्क्समा सोमबार बेलुकी ठूलो विस्फोट हुँदा कम्तीमा एक व्यक्तिको मृत्यु भएको छ। स्थानीय अधिकारीका अनुसार दुर्घटनामा दर्जनौँ कर्मचारी घाइते भएका छन् भने दुई जना अझै सम्पर्कविहीन छन्।

विस्फोटपछि उद्धार टोलीले खोज तथा उद्धार कार्य जारी राखेको छ। घाइतेहरूलाई नजिकैका अस्पतालहरूमा उपचारका लागि पठाइएको छ र पीडितको सङ्ख्या अझै बढ्न सक्ने अनुमान गरिएको छ।

घटनास्थलबाट बाक्लो कालो धुवाँको मुस्लो उठिरहेको देखिएको छ, जसले क्षति व्यापक हुनसक्ने संकेत गरेको छ। पिट्सबर्ग सहरदेखि करिब १५ माइल दक्षिणमा अवस्थित यो कारखानामा विस्फोटको कारणबारे अधिकारीहरूले अनुसन्धान गरिरहेका छन्।