सत्ता समीकरणमा हलचल : कांग्रेस–एमालेबीच मन्त्री हेरफेरको तयारी
काठमाडौं — सत्तारूढ दल नेपाली कांग्रेस र नेकपा एमालेले सरकारभित्र मन्त्री हेरफेरको गृहकार्य थालेका छन्। प्रधानमन्त्री केपी शर्मा ओली नेतृत्वको सरकार बनेको एक वर्ष पूरा भएसँगै मन्त्रीहरूको कार्यसम्पादन मूल्यांकन गर्दै केही हेरफेर गर्ने तयारी गरिएको हो।
प्रधानमन्त्री ओली र कांग्रेस सभापति शेरबहादुर देउवासहित दुवै दलका शीर्ष नेताहरूबीच भएको पछिल्लो छलफलमा मन्त्री हेरफेर प्राथमिक विषयका रूपमा उठेको थियो। छलफलमा उपप्रधानमन्त्री एवं अर्थमन्त्री विष्णुप्रसाद पौडेल, गृहमन्त्री रमेश लेखक, कांग्रेस उपसभापति पूर्णबहादुर खड्का, प्रधानमन्त्रीका राजनीतिक सल्लाहकार विष्णु रिमाल, र महान्यायाधिवक्ता रमेश बडाल सहभागी थिए।
सरकारका प्रवक्ता तथा सञ्चारमन्त्री पृथ्वीसुब्बा गुरुङका अनुसार, सत्तारूढ दलहरूबीच सहमति जुटेमा मन्त्रिपरिषद् पुनर्गठन छिट्टै हुन सक्छ। उनले देशमा सामान्यतः २–३ महिनामा मन्त्रिपरिषद् पुनर्गठन हुने गरे पनि अहिले १३ महिनासम्म कुनै परिवर्तन नभएको भन्दै चासो बढ्नु स्वाभाविक भएको बताए।
कांग्रेसका सूचना तथा प्रचार विभाग प्रमुख मीनबहादुर विश्वकर्माले पनि प्रधानमन्त्रीको चाहनाअनुसार मन्त्री फेर्न कांग्रेसभित्र छलफल भइरहेको जनाएका छन्। उनले सभापति देउवा र पदाधिकारीबीचको निर्णयपछि कांग्रेसको धारणा स्पष्ट हुने बताए।
सूत्रका अनुसार अर्थमन्त्री पौडेल, परराष्ट्रमन्त्री आरजु राणा देउवा, गृहमन्त्री लेखक र सञ्चारमन्त्री गुरुङबाहेक अधिकांश मन्त्रीहरूको हेरफेर हुने सम्भावना रहेको छ। केही समयअघि नियुक्त भएका शिक्षा मन्त्री रघुजी पन्त र संघीय मामिला मन्त्री भगवती न्यौपाने भने यथावत् रहने अनुमान गरिएको छ।
यसैबीच, जनता समाजवादी पार्टी (जसपा) नेपालले उपेन्द्र यादवलाई सरकारमा ल्याउने प्रयास असफल भएपछि समर्थन फिर्ता लिएको छ। त्यस्तै, विवादमा रहेका नागरिक उन्मुक्ति पार्टीले पनि सरकारलाई दिएको समर्थन फिर्ता लिएको छ, जसले मन्त्री हेरफेरसँगै सत्ता समीकरणमा नयाँ तरंग ल्याएको छ।
