ढोका बिग्रिएपछि निगमको न्यारोबडीले ५४ सिट खाली राखेर उडान
काठमाडौं — नेपाल वायुसेवा निगमको सगरमाथा नामक न्यारोबडी विमान मंगलबार राति हङकङ पुगेपछि पछाडिको ‘फोर–एल’ ढोकामा समस्या देखिएको थियो। आपतकालीन प्रयोगका लागि जडान गरिएको स्लाइड बिग्रिएपछि नियमअनुसार वरिपरिको ५४ सिट खाली राखेर मात्र उडान अनुमति दिइएको हो।
निगमका अनुसार हङकङ–काठमाडौं उडानमा ४४ यात्रु मात्र भएकाले तत्काल ठूलो समस्या भएन। तर बैंकक–काठमाडौं फर्किँदा २९ यात्रुलाई होटलमा राख्नु पर्यो। यो प्रावधान न्यूनतम उपकरण सूची (MEL) अनुसार अस्थायी रूपमा मर्मत नगरी उडान गर्न पाउने श्रेणी ‘B’ अन्तर्गत पर्छ, जसको मर्मत १० दिनभित्र अनिवार्य हुन्छ।
निगमका प्रवक्ता मनोजकुमार साहका अनुसार ढोका मर्मत कार्य भइरहेको छ र मलेसिया उडान अघि नै सक्ने योजना छ। तर मर्मत नपुगे ५४ सिट खाली राखेर मात्र उडान गर्नुपर्नेछ।
यसैबीच, निगमको अर्को लुम्बिनी नामक न्यारोबडी विमान इन्जिनको प्राविधिक समस्याका कारण एक सातादेखि काठमाडौंमा ग्राउन्डेड छ, जसका कारण अन्य उडान तालिकामा समेत असर परेको छ।
