विष्णु माझीको नयाँ तीज गीत ‘म त नराउरी’ले युट्युबमा धमाकेदार सुरुआत

काठमाडौँ — लोकप्रिय लोकगायिका विष्णु माझीको तीज गीत म त नराउरी सार्वजनिक भएको एक दिनभित्रै युट्युबमा १२ लाखभन्दा बढी दर्शकले हेरेका छन्। गीतले छोटो समयमा नै सामाजिक सञ्जालमा चर्चा पाएको छ र दर्शकबाट सकारात्मक प्रतिक्रिया पाइरहेको छ।

गीतका शब्द र संगीत उनका श्रीमान् सुन्दरमणि अधिकारीले तयार पारेका हुन्। भिडियोमा ग्रामीण महिलाको जीवनका सपना, संघर्ष, पीडा र जिम्मेवारीको कथालाई चित्रण गरिएको छ। गरिबी, घरेलु हिंसा, गर्भावस्थामा समेत गर्नुपर्ने कडा श्रम, र छोराछोरीको भविष्यप्रतिको चिन्ता यथार्थपरक रूपमा प्रस्तुत गरिएको छ।

यसमा मोडल ललिता पौडेलको मुख्य भूमिका छ भने ६० जना कोरस नर्तकहरू सहभागी छन्। पुतलीको भट्टी श्रृंखलाको २१औँ भागका रूपमा आएको यस गीतले परम्परागत तीजको लयभित्र महिला जीवनका गहिरा वास्तविकताहरू उजागर गर्ने प्रयास गरेको छ।