ग्रे लिष्टबाट नेपाललाई निकाल्न सरकारले कडा पहल गर्ने : अर्थमन्त्री पौडेल
काठमाडौँ — अर्थमन्त्री विष्णुप्रसाद पौडेलले नेपाललाई “ग्रे लिष्ट” बाट निकाल्ने प्रक्रियामा सरकारले कुनै कसर बाँकी नराख्ने बताएका छन्।
राष्ट्रिय सभामा शुक्रबार सांसदहरूको जिज्ञासामा जवाफ दिँदै उनले, नेपाल केवल सूचीबाट बाहिरिने मात्र होइन, आगामी दिनमा पुनः त्यस्तो सूचीमा नपर्ने गरी आवश्यक कानुनी तथा संस्थागत सुधार अघि बढाइरहेको जानकारी दिए।
उनका अनुसार सन् २०२२/२३ मा सम्पन्न अन्तर्राष्ट्रिय मूल्यांकनमा नियमन, सुपरिवेक्षण, अनुसन्धान तथा अपराधबाट आर्जित सम्पत्ति नियन्त्रण जस्ता क्षेत्रमा पर्याप्त प्रगति नदेखिँदा नेपाल ग्रे लिष्टमा परेको हो।
पौडेलका भनाइमा, सरकारद्वारा तयार पारिएको सुधारात्मक कार्ययोजना २०८२ सालदेखि लागू भइसकेको छ। साथै, सम्पत्ति शुद्धीकरण र आतंकवादी गतिविधिमा वित्तीय लगानी रोकथाम गर्न घरजग्गा कारोबारसँग सम्बन्धित संस्थाहरुलाई विशेष निर्देशन दिइएको छ।
त्यस्तै उनले महालेखापरीक्षक कार्यालय अन्तर्गत सातवटा प्रादेशिक कार्यालय खोल्ने तयारी भइरहेको जानकारीसमेत दिए।
