२४ घण्टाको मौसम पूर्वानुमान : केही क्षेत्रमा भारी वर्षाको सम्भावना
काठमाडौं — दशैंको पर्वको बेलामा पनि देशभरको मौसममा मनसुनी प्रभाव जारी रहेको छ। जल तथा मौसम पूर्वानुमान महाशाखाले सोमबार जारी गरेको २४ घण्टाको पूर्वानुमानअनुसार देशका विभिन्न भागहरूमा वर्षाको सम्भावना रहेको छ।
महाशाखाका अनुसार आज दिउँसो देशका सबै प्रदेशहरूका पहाडी क्षेत्रहरूमा साधारण बदली रहनेछ भने अन्य भू-भागहरूमा आंशिक बदली रहने छ। कोशी, बागमती र गण्डकी प्रदेशका पहाडी क्षेत्रहरूका केही स्थानहरूमा मेघगर्जनसहित मध्यम वर्षाको सम्भावना रहेको छ।
यसैगरी कोशी, बागमती र गण्डकी प्रदेशका पहाडी क्षेत्रहरूका एक-दुई स्थानहरूमा भारी वर्षाको पनि सम्भावना रहेको छ। तराई क्षेत्रका एक-दुई स्थानहरूमा पनि मध्यम वर्षाको सम्भावना रहेको महाशाखाले जनाएको छ।
राति गण्डकी र सुदूरपश्चिम प्रदेशका पहाडी क्षेत्रहरूमा साधारण बदली रहने छ भने बाँकी क्षेत्रहरूमा आंशिक बदली रहनेछ। गण्डकी प्रदेशका पहाडी क्षेत्रहरूका केही स्थानहरूमा र कोशी, बागमती, लुम्बिनी र सुदूरपश्चिम प्रदेशका पहाडी क्षेत्रहरूका थोरै स्थानहरूमा मध्यम वर्षाको सम्भावना रहेको छ।
यसबेला राजधानी काठमाडौंलगायत देशका विभिन्न स्थानहरूमा हालै वर्षा भइरहेको छ। दशैंको मौसममा पनि मौसमी अवस्थाको कारण यात्रा गर्नेहरूलाई सतर्क रहन सुझाव दिइएको छ।
