टोकियोमा मोदी : "भारत र जापानको सहकार्यले प्रविधि क्रान्ति सम्भव"
काठमाडौँ — जापान भ्रमणमा रहेका भारतीय प्रधानमन्त्री नरेन्द्र मोदीले टोकियोमा आयोजित इन्डिया–जापान संयुक्त आर्थिक सम्मेलनलाई सम्बोधन गर्दै भारत–जापान सहकार्य प्रविधि क्रान्तिको आधार बन्न सक्ने बताएका छन्।
चारदिने जापान र चीन भ्रमणका क्रममा शुक्रबार टोकियो पुगेका मोदीले जापानलाई भारतको विकास यात्रामा सधैं भरोसायोग्य साझेदारको रूपमा लिइएको बताए। "मेट्रो निर्माणदेखि स्टार्टअप, सेमिकन्डक्टरदेखि हरित ऊर्जासम्मको साझेदारी आपसी विश्वासको प्रतीक हो," उनले भने।
मोदीका अनुसार भारत अहिले विश्वकै सबैभन्दा छिटो गतिमा अघि बढिरहेको प्रमुख अर्थतन्त्र हो र निकट भविष्यमा तेस्रो ठूलो अर्थतन्त्र बन्ने लक्ष्यमा अघि बढिरहेको छ। उनले भारतको पारदर्शी नीति, राजनीतिक स्थिरता र लगानीमैत्री वातावरणलाई बलियो पक्षको रूपमा प्रस्तुत गरे।
भारतले एआई, क्वान्टम कम्प्युटिङ, बायोटेक, अन्तरिक्ष प्रविधि र सेमिकन्डक्टर क्षेत्रमा महत्वाकांक्षी अभियान थालेको उल्लेख गर्दै मोदीले भने, “जापानको प्रविधि र भारतको जनशक्ति मिलेर २१औँ शताब्दीको प्रविधि क्रान्ति नेतृत्व गर्न सक्छ।”
जापान भ्रमणपछि प्रधानमन्त्री मोदी चीन पुग्नेछन्, जहाँ उनी शाङ्घाई सहयोग संगठन (एससीओ) को शिखर सम्मेलनमा सहभागी हुनेछन्। सो कार्यक्रममा प्रधानमन्त्री केपी शर्मा ओलीसहित रुसका राष्ट्रपति भ्लादिमिर पुटिनलगायत २६ देशका राष्ट्रप्रमुख सहभागी हुने बताइएको छ।
