आन्दोलनका बीच भागेका आठ हजारभन्दा बढी कैदी अझै फरार
काठमाडौं – ‘जेनजी’ आन्दोलनका क्रममा देशभरका कारागार र सुधारगृह तोडफोड गरेर भागेका कैदीबन्दीमध्ये आठ हजारभन्दा बढी अझै फरार रहेका छन्।
कारागार व्यवस्थापन विभागका निर्देशक चोमेन्द्र न्यौपानेका अनुसार हालसम्म ६ हजार ३२८ जना कैदीबन्दी स्वेच्छाले फर्किएका वा प्रहरीद्वारा पक्राउ परेका छन्। पछिल्लो एक दिनमै मात्रै १४९ जना पक्राउ वा स्वेच्छाले फर्किएका विभागले जनाएको छ।
गत भदौ २३ र २४ गतेको आन्दोलनमा देशभरका २८ कारागार र नौ बालसुधार गृहबाट १४ हजार ५५५ जना कैदीबन्दी भागेका थिए। तीमध्ये १३ हजार ५९१ जना कारागार र ९६४ जना सुधारगृहका थिए।
अहिलेसम्म फर्किएकामध्ये कारागारबाट ५ हजार ९८७ र सुधारगृहबाट ३४१ जना छन्। बाँकी ८ हजार २२६ जनाको खोजी भइरहेको छ।
नेपाल प्रहरीले हिरासतमा रहेका करिब दुई हजार जना अभियुक्तसमेत आन्दोलनको अव्यवस्थाबीच भागेको र उनीहरूको समेत खोजी भइरहेको जनाएको छ।
आन्दोलनअघि देशभर ३० हजार ६३४ कैदीबन्दी रहेका मध्ये अहिले २१ हजार ९९९ मात्र कारागार तथा सुधारगृहमा रहेका छन्।
