चितवनको राजमार्गमा सवारी चलाउन रोक

चितवन — जिल्ला प्रशासन कार्यालयले भारी वर्षा र पहिरोको जोखिमको कारण चितवन हुँदै चल्ने सवारी साधनमा रोक लगाएको छ। हिजो साँझ ६:०० बजेदेखि अर्को सूचना नआएसम्म नारायणगढ-मुग्लिङ-नागढुङ्गा सडक खण्डमा अत्यावश्यक बाहेकका सबै सवारी साधनहरूको आवतजावत बन्द गरिएको छ।

प्रमुख जिल्ला अधिकारी गणेश अर्यालको जारी विज्ञप्तिमा जल तथा मौसम विज्ञान विभागको पूर्वानुमान र राष्ट्रिय विपद् जोखिम न्यूनीकरण तथा व्यवस्थापन प्राधिकरणको सूचनालाई आधार बनाइएको छ। मौसम विभागले असोज १९ र २० गतेसम्म वर्षा जारी रहने पूर्वानुमान गरेको छ।

यसरी सवारी रोक लगाइएकोले नारायणगढदेखि काठमाडौंतर्फ जाने र चितवन हुँदै अन्य जिल्लामा जाने सबै प्रकारका सवारी साधनहरूको आवागमन प्रभावित भएको छ। जिल्ला सुरक्षा समितिले यो निर्णय कार्यान्वयनमा सहयोग गर्न सबै सम्बन्धित पक्षहरूलाई अनुरोध गरेको छ।