इजरायली आक्रमणमा यमनका प्रधानमन्त्रीको मृत्यु भएको हुथी समूहको दाबी
काठमाडौँ — यमनका हुथी विद्रोहीहरूले इजरायली आक्रमणमा आफ्ना प्रधानमन्त्री अहमद गालिब अल–रहावी मारिएको घोषणा गरेका छन्।
गाजामा चलिरहेको युद्धबीच भएको यो आक्रमण उनीहरूको सबैभन्दा ठूलो क्षति भएको समूहको भनाइ छ। तर, यो जानकारीलाई स्वतन्त्र निकायहरूले भने पुष्टि गरेका छैनन्।
हुथी विद्रोही निकट समाचार एजेन्सीलाई उद्धृत गर्दै रोयटर्सले जनाएको अनुसार समूहका सर्वोच्च राजनीतिक परिषद्का प्रमुख महदी अल–मशातले शनिबार आक्रमणमा अल–रहावीको निधन भएको घोषणा गरेका हुन्। बिहीबार राजधानी सानामा भएको आक्रमणबारे विस्तृत विवरण सार्वजनिक गरिएको छैन, तर केही व्यक्तिहरू घाइते भएको उल्लेख गरिएको छ।
अन्तिम पटक अल–रहावीलाई बुधबार सानामा आयोजित एक सार्वजनिक कार्यक्रममा देखिएको थियो। हुथी विद्रोहीहरूले जारी गरेको विज्ञप्तिमा भनिएको छ, “हामी योद्धा अहमद गालिब नासिर अल–रहावीको निधन भएको घोषणा गर्दछौं। उनी आफ्ना धेरै सहयोगीसहित आक्रमणमा मारिएका छन्।”
यसअघि इजरायलले सानामा इरान समर्थित हुथी समूहका शीर्ष सैन्य अधिकारीहरूलाई लक्षित गरिएको दाबी गरेको थियो। तर, यस पटकको आक्रमणमा हुथी रक्षा मन्त्री पनि मारिएका छन् वा छैनन् भन्नेबारे स्पष्ट गरिएको छैन।
अल–रहावी करिब एक वर्षअघि प्रधानमन्त्री बनेका थिए। तर, वास्तविक सत्ता उनका उपप्रधानमन्त्री मोहम्मद मुफ्ताहले सञ्चालन गर्दै आएको बताइन्छ। शनिबारदेखि मुफ्ताहलाई नै प्रधानमन्त्रीको कार्यभार औपचारिक रूपमा सुम्पिएको छ।
