इजरायली आन्दोलनमा नेपालीहरूको सक्रियता, विपिन जोशीको रिहाइको माग
तेलअविभ — इजरायलमा बन्धकहरूको मुक्तिको मागसहित भएको ठूलो जनप्रदर्शनमा नेपाली समुदायले पनि सहभागिता जनाएका छन्।
तेलअविभको किकार खातुफिम र जेरुसलमस्थित प्रधानमन्त्री निवास अगाडि एकैसाथ आयोजना गरिएको कार्यक्रममा करिब ५० हजार इजरायली नागरिक सहभागी भएका थिए। सो क्रममा नेपालीहरूले नेपालको झण्डा बोकेर उपस्थित हुँदै विद्यार्थी विपिन जोशीको तत्काल रिहाइ गर्न आग्रह गरेका छन्।
आन्दोलनमा सहभागी नेपालीहरूले "विपिनलाई छिटो रिहाइ गर, परिवारसँग हामी छौं" भन्ने नारा नेपालीमै लगाएका थिए।
विपिन जोशी हमासको कब्जामा परेको आज ६९५ दिन पुगेको छ। उनको अवस्था अझै अज्ञात रहेको र रिहाइको माग अन्तर्राष्ट्रिय स्तरसम्म उठ्न थालेको छ। मानवअधिकार संस्थादेखि संयुक्त राष्ट्रसंघसमेतले यो विषयमा ध्यान दिन थालेको बताइएको छ।
हाल हमासको नियन्त्रणमा ५० जना बन्धक रहेको अनुमान छ, जसमा दुई इजरायलीको मृत्यु भइसकेको छ भने बाँकीको अवस्थाबारे स्पष्ट जानकारी छैन।
विशेषज्ञहरूका अनुसार यो मुद्दा केवल विपिनको व्यक्तिगत पीडासम्म सीमित नभई मानवअधिकार, कूटनीति र अन्तर्राष्ट्रिय कानुनसँग पनि जोडिएको छ। नेपाली समुदायले आन्दोलनमार्फत विश्वव्यापी समर्थन जुटाउने प्रयास गरेको देखिन्छ।
