दशैंपछि मुसलधारे वर्षाको चेतावनी, यात्रुहरूलाई सतर्कताको सुझाव
काठमाडौं — दशैंको टीकाको भोलिपल्टदेखि देशभर मुसलधारे वर्षा सुरु हुने सम्भावना रहेको छ। मौसम विज्ञानीहरूको अनुसार विजयादशमीको साँझदेखि विशेषगरी पूर्वी नेपालमा भारी वर्षाको सुरुवात हुने देखिन्छ।
त्रिभुवन विश्वविद्यालयका सहप्राध्यापक विनोद पोखरेलका अनुसार हाल तीनवटा मौसमी प्रणाली विकसित भइरहेका छन्। उनको भनाइमा, "यी प्रणालीको प्रभावले गर्दा विजयादशमीको साँझदेखि पूर्वी नेपालमा मुसलधारे वर्षा सुरु हुनेछ र यो प्रभाव तीनदेखि चार दिनसम्म रहन सक्छ।"
जलवायु विपद् विज्ञ डा. धर्मराज उप्रेतीले पनि असोज १८ गतेपछि पूर्वी नेपाल हुँदै अन्य प्रदेशहरूमा वर्षा तीव्र हुने चेतावनी दिएका छन्। भारतको मौसम विभागले पनि सिक्किम, पश्चिम बंगाल र बिहार क्षेत्रमा भारी वर्षाको चेतावनी जारी गरेको छ।
यो मौसमी परिवर्तनले दशैंपछि कार्यस्थल फर्कने यात्रुहरूको यात्रामा असर पार्न सक्नेमा ध्यान दिँदै मौसमविद्हरूले यात्रा अघि मौसम र सडकस्थितिको जानकारी लिन सुझाव दिएका छन्। साथै धानसहितका बाली भित्र्याउने समय भएकाले असोज १७ गतेदेखि चार–पाँच दिनसम्म बाली नकटाउन पनि सिफारिस गरिएको छ।
