मनसुन देशभरबाट पूर्णरूपले बाहिरियो
काठमाडौँ। यस वर्षको मनसुन देशको सबै भागबाट पूर्णरूपले बाहिरिएको छ। जल तथा मौसम विज्ञान विभागले गत असोज २० गतेदेखि सुरु भएको मनसुनको प्रत्याहरण प्रक्रिया हिजोसम्ममा सम्पन्न भएको जानकारी दिएको छ।
मनसुनको यही प्रत्याहरण निर्धारित मितिभन्दा आठ दिन ढिला भएको हो। विभागका अनुसार गत असोज २० गतेदेखि सुदूरपश्चिम, कर्णाली क्षेत्र र लुम्बिनी प्रदेशका पश्चिमी भूभागबाट मनसुन बाहिरिन सुरु भएको थियो। हिजोदेखि देशको बाँकी रहेका सबै भूभागबाट पनि मनसुन पूर्णरूपमा बाहिरिएको छ।
यस वर्ष मनसुन गत जेठ १५ गते निर्धारित मितिभन्दा १५ दिन अगाडि नै देशभित्र प्रवेश गरेको थियो। मनसुनले देशभर फैलिन २३ दिन लागेको थियो। मनसुनको अन्त्यतिर देशका ५० भन्दा बढी जिल्लामा भारी वर्षाका कारण विभिन्न क्षति भएको थियो।
मौसम विभागले मनसुन बाहिरिए पनि स्थानीय वायु प्रवाह र पश्चिमी वायुको प्रभाव जारी रहन सक्ने बताउँदै आगामी मौसमी सूचनाको लागि विभागीय अपडेट निरन्तर पछ्याउन आग्रह गरेको छ।
